Naipadalan ti RT-PCR test dagiti agarop 40 a mangisursuro ditoy ciudad ti Laoag kalpasan nga adda ti nagpositibo ti covid-19 virus.
Daytoy ti inbatad ni Miss Ruby Felipe, ti mangidadaulo iti Contact Tracing Team ditoy ciudad ti Laoag.
Segun ken ni Felipe, amin a contact ti maseknan ket naipadalan amin ti RT-PCR test no sadinno a lima iti Elementary department idinto a 35 iti High school department.
Gapu iti daytoy, temporaryo a nasuspenso paylaeng ti klase iti nasao a pagadalan.
Innayon na a no negatibo ti resulta ti RT-PCR test dagiti mangisursuro ket mabalin dan ti agsubli iti pagadalan.
Inlawlawag ni Felipe nga immuna a nagpositibo ti dengue ti nasao a mangisursuro isut gapuna nga iti pannakai-confine na iti ospital ket naipadalan iti RT-PCR test no sadinno a positibo ti resulta na.
Inbatad na a kas protocol, masapol a dagiti primary contact ti index case ket maipadalan iti swab test no sadinno a maysa nga estudyante a kameng ti pamilya na ti nagpositibo, rason nga amin dagiti mangisursuro iti pageskwelaan ti ubing ket naipadalan da met iti RT-PCR test.
Inpalgak ni Felipe a saan pay nga ammo no nakaalaan ti index case ti virus ngem dagiti immuna a batch ti mangisursuro a dimmalan ti swab test ket dua kadakuada ti nagpositibo isut gapuna a mabalin nga iti metlaeng pagadalan ti nakaalaan ti maseknan iti nasao a sakit.
Kabayatanna, inpakaammo ni Felipe nga iti agdama ket adda ti 16 nga aktibo a kaso ti covid-19 ditoy ciudad ti Laoag.
