Gob. Matthew Marcos Manotoc, kalikagom na nga adda ti maaramid a “long term solution” iti pakapaspasamakan ti landslide iti Brgy. Pancian iti ili ti Pagudpud

LAOAG CITY – Kalikagum ni Gob. Matthew Marcos Manotoc nga adda ti maaramid a “long term solution” iti masansan a panagreggaay dagiti batbato ken daga iti Sitio Banquero, Brgy. Pancian iti ili ti Pagudpud.

Inbatad na a masansan ti pannakapasamak ti nasao a problema a rason nga adu a motorista ti maap-apektaran, saan laeng a dagiti taga Ilocos Norte ngem karaman pay dagiti umili iti kaparanget a probinsia.                    

Mainaig iti daytoy, inpakaammo ti gobernador a naidanun nan daytoy a problema kenni Sec. Manuel Bonoan iti Department of Public Works and Highways.

Kunana a malaksid iti sekretario ket naiyumanna payen ti nasao a problema kada Department of Public Works and Highways (DPWH) Regional Director Ronnel Tan, District Engr. Glenn Miguel ti DPWH First Engineering District ken pakairamanan ni Cong. Ferdinand Alexander Sandro Marcos ti umuna a distrito ditoy probinsia.

Mamati ni Gob. Marcos Manotoc a kasapulan ti baro a klase ti kalsada a maipasdek iti ili a Pagudpud tapno masolbar ti nasao a problema.

Nupay kasta, impalgakna nga inpabus-uynan kadagiti eksperto ti nasao a banag.

Inlawlawagna a maibilang ti nasao a kalsada a “national highway” rason a responsibilidad ti Department of Public Works and Highways (DPWH) ken ti gobierno national.

Dakkel ti pammati na a babaen iti tulong ni Cong. Marcos nga agserserbi a Deputy Majority Floor Leader ket mailatangan daytoy ti pondo para iti 2023.

Innayonna nga iti panagkitana ket masapul a saan a mabaybay-an ti nasao a problema gapu ta agbalin nga “isolated” ti amianan a paset ti Pagudpud no saan a masolusyonan daytoy.