LAOAG CITY – Saan a rumbeng a dusaen ken patayen dagiti walang nga aso gapu iti panagbaybay-a dagiti akintaraken gapu ta mailabsing daytoy iti linteg kangrunaan na iti Animal Welfare Act.
Daytoy ti inpetteng ni Mr. Norman C. Marquez, ti Animal Welfare Advocate ditoy pagilyan.
Inlawlawag ni Marquez a ti rumbeng a maaramid ket ikabil dagiti walang nga aso kadagiti impounding facilities iti Local Government Units.
Kuna na a maikkan dagiti akintaraken agingga iti tallo nga aldaw tapno mapan da alaen dagiti aso da ken no kayat da nga ipaampon ken nawaya da.
Inbatad na a ti rumbeng pay a mapatawan ti multa ket ti mismo akintaraken ti walang nga aso.
Inpakaammo na a no adda ti makita a mangdusa ken mangpatay iti aso ket masapol nga alaan ti video kas ebidensya ken mabalin a makasoan a deretso ti maseknan iti prosecutors office.
Immun-una iti daytoy, adda ti naidanun ken ni Konsehal John Michael Fariñas a dagiti matiltiliw a walang nga aso iti Barangay 29 ditoy ciudad ti Laoag ket maipagarop a mapatpatay.
