LAOAG CITY – Narigat ngem naragsak ken satisfied ti rikna dagiti mangisursuro.
Daytoy ti inbatad ni Mrs. Sheila Tolentino dela Cruz iti San Nicolas Elementary School iti pannakinnuman ti Bombo Radyo Laoag kenkuana ita a selebrasyon ti Teacher’s Day.
Segun kenni Dela Cruz, iti kangitingitan ti pandemya ti nakariknaan na na a ti panagisuro ket isu ti pudno a karit iti biag.
Inlawlawag na a no kasano ti gagar dagiti estudyante nga agbasa ket doble met ti determinasyon da a makaimula ti sursuro ken agbalin a paset iti panagballigi dagiti adalan da.
Inbatad na a nalaglag-an laengen ita a gundaway no ikumpara iti awan a pulos ti sumrek iti pagadalan.
Mainaig iti daytoy, kunana a saan met a narigat para kenkuana ti panagbalin a mangisursuro ken kas maysa nga ina gapo ta ad-adda pay a maka-relate isuna kadagiti ubbing kasta pay dagiti nagannak.
Innayon na a passion na ti panagisuro ken sipud pay idi ubing ket daytoy a propesyon ti arapaap na.
Kabayatanna, kuna met ni Mr. Jerry Carreon, ti Principal ti Ilocos Norte National High School a maysa kadagiti karit ita kadakuada ket ti transition para kadagiti ubbing manipud iti blended learning ken ita ket face to face classes gapo ta saan a maliklikan nga adda pay laeng ti amak dagitoy.
Dinakamat na a no adda met dagiti problema pakaseknan kadagiti estudyante ket adda ti sursurten da tapno mai-guide dagitoy.
Kabayatanna, adda met dagiti naorganisar nga aktibidad para kadagiti mangisursuro ita nga aldaw.
