LAOAG CITY – Inbatad ni Barangay Chairman Pete Duldulao iti Barangay Bugnay iti ili ti San Nicolas nga umabot iti agarop 100 nga ektarya ti saan a namulaan ti pagay gapo iti nakurang a danom a pagtalon.
Segun kenni Duldulao, addan ti dua a dekada a kastoy ti problema iti barangay da.
Inlawlawag na nga adda met ti Small Water Impounding Dam ngem arig na saan da a mausar gapo ta awan ti pagayusan ti danom.
Gapo iti daytoy, kunana nga namin-ado metten a daras nga inyuman na daytoy iti lokal a gobierno iti ili ti San Nicolas tapno matarimaan ken mapan met kitkitaen ti Municipal Agriculturist.
Naamoan a gapo ta saan a nakatalon dagiti dadduma ket nangipaay ti 10 a kilo ti bagas iti kada pamilya ken ti pondo ket aggapo a mismo kenkuana.
Kabayatanna, mangnamnama ni Duldulao a maipaayan da ti tulong para iti panagtalon.
