LAOAG CITY – Inyistorya ni Mr. Marc Neilsen Lorenzo, residente iti Barangay 1 iti ili ti Vintar ti rason no apay a nakabkabil babaen iti agarop 10 a tattao.
Segun kenni Lorenzo, manarimaan ti ay-ayam idi rabii ken ti taktika ti grupo da ket double team wenno ti panang-gwardiya da iti kalaban da ken agawen da ti bola ken ditoy a maipagarop a nasikil ti parte ti bagi na.
Inlawlawag na a bayat ti ay-ayam ket nasipat na met ti likod ti maysa a player iti kalaban da a grupo ken ditoy metten a napabasol a dinanog na ti maseknan ngem naglikudan na daytoy.
Inbatad na a gapo iti daytoy ket kinamat isuna dagiti players ken sumagmamano nga agbuybuya ken idi naigalis ken napakleb ken ditoyen a kinabkabail ti agarop 10 a tattao no sadinno ket nadanog ti ulo na ken nakugkugtaran pay nga isu ti rason ti nagsagabaan na ti sugat iti abaga ken ima ken dugol iti ulo na.
Kalpasan daytoy a pasamak, kunana a pinaleppas da pay laeng ti ay-ayam sakbay da a napan nagreport iti PNP ken nagpa-medical.
Dinakamat na a nabara ti laban iti daytoy a gundaway gapo ta maipagarop a maab-abak ti grupo a kalaban da.
Inpetteng ni Lorenzo nga awan ti nakita na nga agbanbantay kabayatan ti pay-ayam.
Kunana a tallo kadagiti players a maipagarop a nangkabil kenkuana ti nadeterminar dan ken rumrumuar a residente dagitoy iti Barangay Caaoacan ditoy ciudad ti Laoag ken kalikagom da a makasarita dagitoy.
Mainaig iti daytoy, desidido ti biktima a mangireklamo dagiti nangkabil kenkuana.
Kabayatanna, inbatad ni Mrs. Imelda Lorenzo a nasakit ti nakem na gapo iti nakapamay-an iti anak na rason a kalikagom na a makasarita.
Kalikagom pay ti ina a Lorenzo a malawlawagan no apay nga awan ti agbanbantay para iti seguridad ken medics no bilang adda ti mapasamak.
Agkidkiddaw pay daytoy ti tulong kenni Vice Mayor Carlos Fariñas.
