Inbatad ni Jail Warden Editor Guiang a maysa kadagiti aktibidad dagiti Persons Deprived of Liberty (PDL) iti Ilocos Norte Provincial Jail ti panagaramid ti parol aglalo ita a mapaspasangan ti paskua.
Kunana a babaen iti daytoy ket adda ti pakakumikuman ken masubok ti creativity dagiti balud kabayatan ti kaadda da iti uneg ti pagbaludan.
Malaksid iti daytoy, matulungan da pay ti pamilya da uray bassit laeng gapu ta ti paglakoan da kadagiti parol ket pagbibingayan da metlaeng.
Mainaig iti daytoy, ado dagiti departamento ken indibidual a gumatgatang kadagiti parol nga araramiden dagiti Persons Deprived of Liberty.
Kabayatanna, inbatad ni Guiang a ti bulan ti Oktubre ket bulan ti pannakaselebrar ti Nationwide Celebration of Prison Awareness no sadinno nga agbalin nga aktibo dagiti Persons Deprived of Liberty babaen iti sports tournament kas ti basketball, volleyball, badminton ken chess nga isayangkatda.
