LAOAG CITY – Nag-viral ti video ti maysa a baket a dinangran ti kaanakan na a lalaki iti Brgy. Caraitan iti ili ti Badoc.
Iti agdama ket umaboten ti nasurok 100 a ribo a views ti nasao a video.
Binigbig ni Miss Nova Margarrete Pagdilao ti biktima a ni Emilia Saludez, agtawen ti 72 ken residente iti nasao a barangay.
Segun ken ni Pagdilao, addan ti panagkabaw ti baket ken daytoy ket mentally challenged.
Iti nakalap nga impormasyon ti Municipal Social Welfare and Development iti ili ti Badoc, inay-ayam ti baket ti rugitna isut gapuna a nakapungtot ti kaanakan na a lalaki.
Inbatad ni Pagdilao a nabayagen a kastoy ti araramiden ti baket ken dakkel a riribok ti kaanakan na aglalo ket maysa a Person With Disability idinto na-stroke met ti asawa na.
Saan a masinunuo ti nasao nga opisina no daytoy ti damo a dangran ti kaanakan na ti baket. Mainaig iti daytoy, inpaima ti nasao nga opisina iti sabali a kabagyan ti baket a mangaywan kenkuana ken inpanamanama na nga agtultuloy ti panangmonitor da iti sitwasyon na.
