LAOAG CITY – Pormal a nagpanawagan dagiti grupo ti hog producers para iti insigida a panangngato ti taripa ken temporario a panagsardeng iti panag-angkat ti karne.
Segun kadagitoy a mapukpukawan ti dakkel a pondo ken sumangsango ti pakabuklan a panagtulid ti lokal nga industria ti panagnegosio ti baboy iti pagilian.
Iti maysa a joint manifesto ti aliansa dagiti lokal nga agtaraken ti baboy, naamoan a bimmagsak iti P90 agingga P120 ti tunggal kilo ti liveweight farmgate price kabayatan ti agtultuloy ti panagngato ti presio ti taraon a nangitunda tapno malugi dagiti agbababoy ti agingga P9,000 iti tunggal taraknen a baboy.
Gapu iti daytoy, kiddaw ti grupo ti alisto a panagsubli ti import tariff iti 40 a porsiento para iti out-quota ken 30 a porsiento para iti in-quota kagiddan ti pananagipatungpal ti temporary import ban, freeze order iti panangiparuk-at ti frozen imported pork manipud iti cold storage ken 100 a porsiento a quarantine inspection kadagiti daungan.
Nupay kasta, nangipila ni Senador Francis Pangilinan ti Senate Resolution 726 tapno maimbestigaran ti krisis iti sektor ti livestock ken poultry no sadinno mapatta-patta nga umabot iti P250 million ti inaldaw ti maluglugi kadagiti local hog raisers gapu iti nakababbaba a farmgate price kumparar iti production cost nga P180 agingga P190 iti kada kilo.
Inpaganetget ti Senador ken dagiti grupo iti industria a saan nga insigida a masolusionan ti situasion iti tulong ti umno a taripa ken proteksion iti lokal a produksion, addo kadagiti agbabbaboy ti agtennag nga agsardeng iti negosio a mangitunda ti ad-adda a panagdependar ti pagilian iti imported a karne ken mangikabil iti pangta iti national food security.
