LAOAG CITY – Naobserbaran ti narisgo a haze kadagiti walo a lugar ditoy pagilian a posible a gapu iti asuk manipud iti Kalimatan idiay Indonesia.
Daytoy ket basar iti Department of Environment and Natural Resources-Environmental Management Bureau (DENR-EMB).
Mainaig iti daytoy, impakkaammo ti ahensia a mabalin a naiyangin a nagturong ditoy Pilipinas ti asuk ken haze manipud kadagiti puor idiay Indonesia.
Iti Western Mindanao State University idiay San Ramon, Talisayan, Zamboanga City, immaboten iti 201 agingga 300 ti Air Quality Index (AQI), a maibilang a narisgo a lang-aben.
Nairekord met ti Air Quality Index (AQI) nga 151 agingga 200 iti Sta. Cruz, Tagoloan ken Misamis Oriental.
Malaksid kadagiti nadakamat a lugar, innem pay a lugar iti nakairekord ti Air Quality Index (AQI) a 101 agingga 150 a kaibatugan ti narisgo para kadagiti sensitibo iti polusion.
Karaman ditoy ti:
–Meycauayan City Air Quality Monitoring Station
–Talisay City
–Department of Environment and Natural Resources Region 10 Compound iti Cagayan de Oro City
–Iligan City
–Barangay Aplaya, Digos City, Davao del Sur
–Barangay Culaman, Malita, Davao Occidental
Gapu iti daytoy, nabalakadan dagiti ubbing, nataengan ken dagiti adda sagsagabaenna a sakit iti puso wenno marigatan nga aganges a liklikan ti panagruar.
