LAOAG CITY – Inlawlawag ni Dr. Gabriel Borlongan, Division Chief ti Environmental and Occupational Health Division ti Department of Health, a ti haze ket maysa a naingpis agingga ti nabengbeng a layer ti asok ken bassit a pollutant particles a maur-urnong iti angin, a mangpababa ti air quality.
Kunana nga adda ti innem a kategorya ti air quality index nga iparparuk-at Department of Environment and Natural Resources.
Inbatad na a dagitoy ket ti Green agingga iti yellow wenno Good agingga iti Fair) no sadinno nga awan pay ti problema iti angin ken awan pay ti abiso a kasapulan nga aramiden.
Orange wenno unhealthy for sensitive groups, kayatna a sawen ket kasapulan ti agannad dagiti comorbidities ken addaan ti sensitive wenno vulnerable population.
Red wenno very unhealthy, no sadinno a kasapulan a patibkeren ti proteksyon iti amin idinto a ti Purple wenno Acutely unhealthy, a kayatna a sawen ket nangatngato ti protection measures a kasapulan nga aramiden para iti bukod a bagi.
Kamaudianan na ket ti Maroon wenno Emergency no sadinno a daytoy ti kangatoan a protection measures a rumbeng nga aramiden gapu ta adda iti angin dagiti amin a pollutant particles nga PM2.5, a mabalin a sumrek iti agong, bara ken gapu ta babassit dagitoy ket mabalin pay a sumrek iti dara wenno agturong kadagiti pagayusan ti dara iti arteries..
Inbalakad ni Dr. Borlongan a tapno maprotehiran ti bagi iti haze ket liklikan wenno saan paylaeng a rumrumuar no awan ti napateg nga aramiden iti ruwar, ngem no saan a maliklikan ket agusar ti N95 mask, ngem no gagangay laeng a facemask ti usaren ket nasken a doblien daytoy.
