LAOAG CITY – Banbantayan ti Department of Health (DOH) ti possible a panagngato dagiti agpaospital ken agpakonsultar gapu iti haze a makaapektar iti sumagmamano a paset ti Luzon Ken Visayas.
Iti report, inbatad ni DOH Environmental and Occupational Health Division chief Dr. Gabriel Borlongan nga Awan pay ti nairekord a panagngato ti hospital admissions wenno consultations a direkta a naikonektar iti haze.
Nupay kasta, kunana a paigetan ti DoH ti surveillance tapno madeterminar no adda ti epekto ti haze iti salun-at ti publiko.
Ti haze a mapaspasaran ti sumagmamano a paset ti pagilian ket maikonkonektar iti asok manipod iti wildfires iti Indonesia a guyguyuden ti habagat nga agturong iti Pilipinas.
Segun iti DOH, partikular a rumbeng a bantayan ti PM2.5 wenno napino a particulate matter a mabalin a makastrek a nauneg iti respiratory system Ken possible nga umabot iti bloodstream.
Mabalin a nangitunda ti exposure ti panaguyek, iritasyon iti agong Ken karabukob, narigat nga umanges Ken panagkaro ti asthma Ken dadduma pay a sakit iti Bara.
Ad-adda a vulnerable ditoy dagiti ubbing, senior citizens, masikog Ken dagiti tattao nga addaan to asthma, chronic obstructive pulmonary disease (COPD), sakit iti puso wenno history ti stroke.
