LAOAG CITY – Naarestar ti maysa a lalaki iti paset ti Brgy. 1, Canaan iti ili ti Badoc babaen iti naisayangkat nga Anti-Illegal Drug Operation.
Binigbig ni Police Major Joseph Tayaban, ti Hepe ti Philippine National Police iti nasao nga ili ti subject ti operasion a ni Gerald Valido y Pamittan, agtawen ti 36, awanan asawa ken residente iti nadakamat a Barangay.
Inlawlawagna a natiliw ti suspek kalpasan a naglako ti maysa a heat sealed transparent plastic sachet a naglaon ti maipagarup a shabu iti maysa a police poseur-buyer.
Kunana a malaksid iti inlako ti suspek ket nakumpiskar pay iti suspek kabayatan ti panagkapkap dagiti otoridad ti lima a pidaso ti bassit a heat sealed transparent plastic sachet a naglaon ti maatap a shabu, maysa a pidaso ti cellphone, maysa a round pouch nga agmaris ti nangisit, maysa a lighter ken kuarta a sangaribo a pisos a nausar kas buy-bust money.
Inbatadna a mapatta-patta nga agdagsen ti nakumpiskar nga items iti maysa a gramo ken addaan daytoy ti standard drug price a 6,800 pesos.
Kunana a maibilang ni Valido kas Street Level Individual.
Innayonna a balligi a naisayangkat ti Anti-Illegal Drug Operation babaen iti nagtitipon a pwersa ti 2nd INPMFC, PIU-INPPO, PDEA-RO1 ken PNP Badoc kas Lead Unit ti operasion.
