LAOAG CITY – Kinumpirmaran ni Barangay Kagawad Jay-Z Lagundino iti Barangay Pancian iti ili ti Pagudpud nga inbilin ni Gov. Matthew Marcos Manotoc a maipawil pay kadagiti tattao a dumalyasat iti Sitio Banquero gapo iti panagreggaay ti daga.
Segun kenni Lagundino, mabalin a pilaan ti Philippine National Police ti kaso ti siasinno man a mangipilit ti dumalyasat iti nasao a paset ti lugar.
Gapo iti daytoy, naiget ti panagbantay ti PNP pakarairaman isuda a barangay officials tapno masigurado nga awan ti aggandat a dumalan.
Kunana a makadalan metten dagiti equipment kangrunaan na kadagiti mangipaay ti tulong.
Inlawlawag na nga ita ket agtultuloy pay laeng ti clearing operation ken saan na a masigurado no agingga kaano a nakarikep ti kalsada.
Kabayatanna, naamoan nga awan pay ti kuryente iti nasao a barangay.
