LAOAG CITY – Nagballigi dagiti otoridad a nangtiliw iti maysa a lalaki iti inyuswat da a drug buybust operation iti Brgy. 7-B ditoy siudad ti Laoag.
Nabigbig ti subject ti operasyon a ni JAE CABACUNGAN y ACERET, agtawen ti 38, addaan ti live-in partner, maysa a poultry delivery boy ken residente ti Brgy. 19 iti ili ti Vintar.
Naamoan a ni Cabacungan ket maibilang kas street level individual.
Insigida a kinemmeg dagiti otoridad ti subject ti operasyon kalpasan a naglako ti maysa a sachet a naglaon ti maipagarop a shabu iti nagpammarang a poseur-buyer.
Iti panangkapkap dagiti otoridad ken ni Cabacungan ke naala da iti ikot na ti sangaribo a pisos a nausar iti operasyon ken ti uppat a pedaso ti sagsangaribo a pisos a peke a kwarta, nangisit a pitaka a nakaipanan ti ID ken cellphone ti subject ti operasyon.
Kabayatanna, inpetteng ni Cabacungan a naimula laeng kenkuana ti narekobre maatap a shabu.
Inlawlawag na a makipagkita koma iti maysa a babai a naam-ammo na laeng iti social media.
Nupay kasta, kabayatan ti panangur-uray na iti nasao babai ket bigla lattan nga adda dagiti nakamotorsiklo a nangkamat kenkuana manipod iti Brgy. 5 agingga iti Brgy. 7 ditoy ciudad ti Laoag nga asiddeg iti pagkaseraan na.
Innayon ni Aceret nga awan ti naaramidan na idi nakamatan da daytoy ken addan ti shabu iti bulsa na ken ti sangaribo a pisos a kwarta na ket nagbalin metten a 5 ribo a pisos.
Inpalgak na a saanna pay pulos a napadasan ti nagusar wenno naglako ti illegal a droga ken kagapgapu na laeng a napan nagdeliver ti manok idi naisayangkatan ti operasyon.
