LAOAG CITY – Inbatad ni Barangay Chairman Sammy Aquino iti Barangay 24 ditoy ciudad ti Laoag a saan na a maawatan no apay a naibaga ni Macario Sahagun nga inbabain na isuna kabayatan ti General Assembly.
Segun kenni Aquino, saan na nga inbabain no diket inlawlawag na laeng kadagiti bumarangay ti kidkiddawen ni Sahagun a pannakapirma ti sertipikasyon para ti subsidy gapo ta ti pamilya na ket miembro ti 4Ps.
Inadmitir na a kabayatan ti general assembly ket nadakamat na dagiti nagbalin a kinadenna ni Sahagun ken inbaga na a mismo ti nagan ni Macario.
Kunana a kalpasan ti meeting da ket nagsarita da iti ina ni Macario a ni Mrs. Teofila Sahagun ken ditoy nga inlawlawag na ti saan na a panangited ti sertipikasyon iti anak daytoy.
Innayon na nga awan ti dakes nga intensyon na kadagiti agina a Sahagun.
Ummuna iti daytoy, inbatad Mrs. Sahagun a naklaat laengen idi nangeg na ti nagan ti anak na ni Macario Sahagun a dinakamat ti kapitan.
Inbatad na a nagnerbyus gapo kadagiti nasarita ti kapitan kontra iti anak na a ni Macario iti baet a general assembly ti naiyawag iti panagtataripnong.
