LAOAG CITY – Inlawlawag ni Mr. Norman Marquez, ti Senior Animal Welfare Advocate dagiti rason no apay a saan a rumbeng a papatayen ti aso.
Kunana a malaksid a panaglabsing daytoy iti Republic Act 8485 wenno Animal Welfare Act, mabalin a makaitunda daytoy ti sakit nangruna ket saan a karaman ti aso kadagiti taraon a mabalin a kanen.
Inbatad na a no ti naparti nga aso ket mailako ti karne na ket mailabsing met iti Dog Meat Trade idinto a no naluton ti karne na ken mailako ket aglabsing iti Food Safety Act wenno Republic Act 10611 ken mabalin a maiparikep ti pasdek a naglako iti daytoy.
Kunana a kadagiti aglabsing iti daytoy ket agmulta ti saan a nababbaba ngem lima ribo a pisos iti maysa nga aso ken maibalod ti maysa agingga iti uppat a tawen.
Mainaig iti daytoy, kunana a no kasapulan a mapapatay ti aso gapo iti nagduduma a rason kas iti sakit ken sabsabli pay ket nasken a masurot ti umno a wagas no sadinno nasken a siiimatang ti veterinarian.
Rakurak na daytoy kalpasan nga adda ti natiliw ditoy ciudad ti laoag a baro gapo iti panagparti na ti aso.
