LAOAG CITY – Nangipasa ni Sang panlungsod member Jason Perera ditoy ciudad ti Laoag ti maysa a resolusyon para iti panagsurat da ken ni Presidente Ferdinand Marcos Jr., Department of Energy (DOE), Senador Imee Marcos, Governor Matthew Marcos-Manotoc ken ti dua a kongresista ditoy probinsya.
Gagem ti panagsurat dagiti kameng ti konseho ditoy ciudad ket tapno idanun ti nabayagen a problema iti probinsya seknan iti nangato a singir iti kuryente iti Ilocos Norte Electric Cooperative (INEC).
Inpetteng ni Perera nga iti agdama ket maymaysa ti pagpapadaan a problema dagiti residente ditoy probinsya, daytoy ket ti nangina unay a singir iti kuryente.
Inpalgak na nga uray dagiti nababaknang ket riknaen da ti nangato a singir iti kuryente.
Mainaig iti daytoy, amin a kameng ti konseho ditoy ciudad ket immanamong iti kalikagom ni konsehal Perera.
Mangnamnama ni Perera a masolusyunan ti problema dagiti member-consumers iti kooperatiba iti kabiitan a panawen.
