LAOAG CITY – Balligi ti panaginspeksyon dagiti kameng ti Department of Agriculture (DA)-Region 1 iti panangidaulo ni Doctora Connie Diaz ditoy probinsya a pakairamanan iti ili ti Vintar.
Daytoy ti inbatad ni Mayor Richard Degala iti nasao nga ili.
Segun ken ni Mayor Degala, naginspeksyon dagiti kameng ti Department of Agriculture (DA)-Region 1 kadagiti lugar a mapagatapan nga apektado ti Avian Influenza wenno bird flu a maysa a sakit dagiti taraken a manok.
Immunan nga inadmitir ni Doctora Myrna Simon, ti municipal agriculturist iti ili ti Vintar a naalarma gapu iti nasao a sakit ti manok.
Inpakaammo na nga addan dagiti 20 a tao da a naiwaras tapno agimbestigar iti nasao a kaso.
Kuna met ni Doctora Diaz nga agkolektar da ti sample kadagiti taraken a manok a maatap a naapektaran ti bird flu tapno maeksamen.
Inpasigurado ni Mayor Degala nga aramiden da amin a kabaelan da tapno saan nga agwaras ti nasao a sakit dagiti taraken a manok iti ili ti Vintar.
