Inlawlawag ni Dr. Rodrigo Catcatan, mangidadaulo ti City Health Office (CHO) a ti pannakaibus dagiti dengue test kits ket gapu iti panagado ti bilang dagiti kaso ti dengue ditoy siudad ti Laoag.
Segun kenkuana, ti Department of Health (DOH) ti mangisupply kadagiti dengue test kits, ngem gapu iti panagadu ti kaso, naibus dagiti suplayda.
Apaman daytoy, nagkiddaw ti City Health Office (CHO) ti kanyonan a test kits ngem awan ti naipaay ti Department of Health (DOH) gapu ta naibos ti suplayda.
Mainaig iti daytoy, no maipapain iti datos ti City Health Office (CHO) agingga idi Oktubre 13 ita a tawen ket nakairekord da ti 338 a kaso ti dengue a nangatngato ngem iti nasurok 200 a kaso a naireport iti isu met laeng a panawen idi 2025.
Impetteng ni Dr. Catcatan nga adda ti pondo ti siudad manipud iti general fund para kadagiti kasapulan ti laboratoryo, medisina ken dental supplies, a mabalin a mausar met para iti panaggatang kadagiti dengue test kits.
Innayonna a mabalin a mausar ti nasao a pondo para iti panaggatang kadagiti dengue test kits gapu ta paset daytoy kadagiti kasapulan ti laboratory.
Kabayatanna, kuna ni Dr. Catcatan nga agtultuloy ti panagkiddaw ti City Health Office (CHO) kadagiti kasapulan a suplay, kabayatan a maipatpatungpal ti panangipaay kadagiti laboratory request kadagiti pasyente tapno maiwayat ti pannaka-eksamen da a maiyataday iti kasayaatan a pamuspusan ken available a suplay ti laboratoryo.
