LAOAG CITY – Napaneknekan dagiti otoridad nga awan ti foul play-na ti pannakatay ti maysa a lalaki iti Brgy. 30-B Sta. Maria ditoy siudad ti Laoag.
Daytoy ti rimuar iti imbestigasion ti Philippine National Police Laoag.
Basar iti Philippine National Police a kas basar ti deklarasion ti City Health Office, ti nasao nga indibidual ket pimmusay gapu iti Myocardial Infarction Secondary to Cardiac arrest.
Maipalagip nga immununan a nakita a nalamiisen a bangkay ti maysa a lalaki iti Construction Corp., a masarakan iti Brgy. 30-B, Sta. Maria, Laoag City.
Inbatad ti Philippine National a ti pimmusay nga indibidual ket maysa nga lalaki nga agtawen t 63, naasawaan, construction worker taga Brgy. Tablac, Candon City, Ilocos Sur, ken manariaan a residente ti Brgy. 30-B, Sta. Maria, Laoag City, Ilocos Norte.
Iti pakpakauna nga imbestigasion ti Philippine National Police Laoag, pasado alas 8:06 ti bigat idi pinadas ti katrabahona a tawagan daytoy babaen t panangtawag iti cellphone-na ngem saan daytoy a sumungsungbat.
Gapu iti daytoy, nagturong daytoy iti barracks nga ayan ti indibidual ket ditoy a naduktalanna a nakadata daytoy iti katrena nga awan puotnan.
Inawaganna dagiti dadduma pay a katrabahona ken ditoy nga insigida a nagkiddawda ti tulong manipud kadagiti otoridad.
Segun iti Philippine, apaman a nakadanonda iti lugar ket insigida a pinadasda a riingen daytoy ngem awan ti aniaman a reaksionnan.
Nagpatulongda iti Department of Public Safety ket ditoy a naideklar a daytoyen ket pimmusay.
Kabayatanna, basar iti health officer ket pimmusay daytoy gapu iti atake ti puso.
