LAOAG CITY – Ipalubos ti city government ti pannakausar dagiti multi-purpose vehicle a naibunong kadagiti nagduduma a barangay a panangitaray kadagiti pasiente kadagiti ospital nga adda iti ruar ti suidad ti Laoag, segun ken ni Laoag City Mayor Jame Bryan Alcid.
Nupay kasta, kunana nga manarimaan pay laeng ti panangiplastarda kadagiti guidelines, kabinnulig ti City Disaster Risk Reduction and Management Office, nga isunto ti panangibasaran dagiti tunggal barangay tapno maipalubos wenno maipawil ti pannakausar ti multi-purpose vehicle.
Iti agdama, inkiddaw ni Alcid a napinpintas nga ipaima iti Department of Public Safety wenno City Health Office dagiti pasiente nga adda iti kritikal a kondision.
Kunana a no man makita a saan a kritikal ti kasasaad ti pasiente ket maipalubos a mausar ti multi-purpose vehicle kas lugan a mapan iti ospital.
Nupay kasta, no kritikal ti kasasaad ti pasiente ket agkasapulan ti naan-anay a pannakaasistir ti salun-at kabayatan a maibiahe isu napinpintas no dagiti healthcare professional ti kakuyogda a mapan iti ospital.
Kabayatanna, inpanamnama ni Alcid iti kabiitan a panawen ket maiplastar ti guidelines ken maibunong kadagiti barangay.
Inpakaammona nga adda maisayangkat a training wenno panagsanay kadagiti nagduduma a personnel kadagiti barangay ken karaman kadagiti mangipaay ti training ket ti City Disaster Risk Reduction and Management Office, Department of Public Safety ken Department of Health
Maipalagip nga idi laeng kallabes a rinugyanan ti city government ti nagibunong kadagiti 40 a multi-purpose vehicle a kangrunaan a mausar iti kalamidad, panangtulong kadagiti kabarangayan ken dadduma pay nga aktibidad ti barangay ken iti city government.
