LAOAG CITY – Naikkanen ti kompanya nga UNITOP ti retaining walls iti kalsada iti paset ti Barangay Salet-Bulangon ditoy ciudad ti Laoag.
Daytoy ti inpakaammo ni Vice Mayor Rey Carlos Fariñas ditoy ciudad.
Maipalagip a naapektaran amin dagiti residente iti nadakamat a barangay gapu iti saan a pannangileppas a dagus ti kompanya iti retaining walls iti kalsada.
Gapu iti daytoy, inrekomendar ti konseho ditoy ciudad ti pannakasuspenso ti permit ti UNITOP.
Maragsakan ti bise mayor gapu ta inleppasen ti nasao a kompanya ti proyekto da angrunaan na ti panangtarimaan da ti retaining walls iti kalsada iti nadakamat a barangay.
Kuna na nga inuray paylaeng ti nasao a kompanya ti rekomendasyon da a masuspenso ti permit da no saan da nga ileppas ti proyekto da.
Innayon ni Fariñas a no inleppas koma a dagus ti kompanya ti nangikabil ti retaining walls iti kalsada ket basbassit koma ti nagastos da.
Mainaig iti daytoy, kalikagom ti bise mayor nga imbitaran ti kompanya iti sumaruno a sesyon da tapno personal met laeng a maidanun na ti panagyaman na iti panangileppas dan proyekto da iti nadakamat a barangay.
