LAOAG CITY – Inpakaammo ni SFO1 Redento Guillermo, Chief Operations ti Bureau of Fire Protection iti ili ti San Nicolas nga umabot iti 102 a ribu a pisos iti inisyal a balor ti pannakadadael dagiti tallo a pagtaengan a nauram iti Brgy. 23, Sta. Cecilia, Sitio 7, Taguiporo iti nasao nga ili.
Segun kenkuana, ti nangibasaran ti BFP San Nicolas ti balor ti perdisyon ti napasamak nga uram ket ti Operational Procedures Manual.
Kunana a manarimaan ti pannaka-aramid ti affidavit dagiti maseknan a nauraman tapno ditoy a makaalada ti naan-anay nga impormasion ti umiso a balor ti nairamraman a nauram.
Inlawlawagna nga agpapan iti daytoy a gundaway ket saan pay a masinunuo ti BFP San Nicolas ti namunganayan ti uram gapu ta agtultuloy pay laeng ti maisaysayangkat nga imbestigasion.
Inbatadna a ti umuna a pagtaengan wenno ti nagrugian ti uram ket saan pay a napalubusan nga agsubli iti pagtaenganda idinto a dagiti dua a pagtaengan a nairamraman ti insidente ket naikkan dagitoyen ti pammalubos a mapan mangdalus wenno mangikkat dagiti nadadael a ramit kadagiti pagtaenganda.
Nupay kasta, inpalgakna a saan pay dagitoy a mabalin a mapalubusan nga agsubli iti pagtaenganda tapno maturog wenno aniaman a kalikagum gapu ta adda ti posibilidad a narisgo pay laeng dagiti tallo a maseknan a pagtaengan.
