LAOAG CITY – Nakidanggay ti Sirib Ilocano Kabataan Association wenno SIKA iti panangrambak ti pagilian iti “volunteerism month” ita a bulan ti Disiembre.
Segun ken ni Mr. Patrick Ratuita, presidente ti SIKA, naisayangkat ti Sagut nga Ayat iti Far East Zone idi bisperas ti paskua.
Inlawlawagna a ditoy a nangisayangkatda ti “outreach program” a mangitandudu iti pagimbagan dagiti senior citizen.
Kunana a naiyuswat ti nasao nga aktibidad iti Brgy. Pacifico iti ili ti Marcos idinto nga intono Disiembre 30 ket maiyuswat met laeng ti Sagut nga Ayat “Outreach Program” iti Brgy. San Pedro iti ili ti Sarrat.
Nupay kasta, kuna ni Ratuita a daytoy ket saan a para kadagiti natataengan ngem para kadagiti ub-ubbing.
Kunana nga adda pay ti inyuswatda a Sagut nga Ayat iti Far North Zone a maawagan (Sikatutubo, Kapatid Ko. Sagot Ko).
Inbatadna a ti nasao nga outreach program ket nairanta a para kadagiti kameng ti Indigenous Community kangrunaanna kadagiti aeta iti Brgy. Baruyen iti ili ti Bangui.
Segun kenkuana, sabali pay nga outreach program ti naiyuswat iti Far South Zone ken East Zone.
Kunana nga iti umabagatan a paset ti probinsia ket maisayangkat iti Brgy. Paltit iti ili ti Badoc idinto nga iti dumaya ket iti Brgy. Manalpac iti ili ti Solsona.
Innayonna a gagem daytoy nga aktibidad a maipaayan ti food pack dagiti nakurkurang ti gasatna nga umili kadagiti nadakamat a lugar.
Kabayatanna, inpakaammo ni Ratuita nga adda pay ti maisayangkat a coastal clean-up ken SIKA Mental Health Break Camp.
