LAOAG CITY – Inbatad ni Mr. Mc Donald Bagaoisan, maysa kadagiti aglaklako ti paputok iti siruk ti Gilbert Bridge ditoy ciudad ti Laoag a mabilbilang paylaeng dagiti mapmapan aggatang iti produkto da.
Inpakaammo na nga umabot iti 70 a porsiento ti nagngatoan ti presyo dagiti paputok gapu ta nangina met ti panagawat da manipod iti Bacaue, Bulacan.
Nupay kasta, kuna ni Bagaoisan nga awanen ti pagngatoan ti presyo dagiti paputok agingga iti panangsarabo ti baro a tawen.
Segun pay ken ni Bagaoisan, no tumawar dagiti customers da ket ikonsiderar da ngem masapol a saan da a maatiwan.
Inpalgak na a ti judas belt (600 a pisos); fountain colored (1,000 a pisos); 16-shots ket agbalor iti P4,500 a pisos; Losses a Roman candle (200 a pisos); kwitis (15 a pisos iti kada pedaso); idinto a dagiti gagangay laeng a fireworks display ket agbalor iti 5 agingga iti 7 ribo a pisos.
Kabayatanna, nagyaman ni Bagaoisan gapu ta sipud nangrugi da a nagpwesto iti siruk ti rangtay ket inaldaw a mapan aginspeksyon ken agmonitor dagiti kameng ti Bureau of Fire Protection (BFP) ditoy ciudad ti Laoag.
