LAOAG CITY – Agsasarita ti pamilya ti biktima a pimmusay a ni Chrismar Nicolas, agtawen ti 24, driver ti motorsiklo, awanan asawa ken residente ti Brgy. 38-Mangato ditoy Siudad ti Laoag ken ti suspek a ni Marcon Maneja, agtawen 40, driver ti pick-up, naasawaan ken residente ti Brgy. San Marcos iti ili ti Dingras iti napasamak a desgrasia iti paset ti national highway a sakupen ti Brgy. 40, Balatong ditoy Siudad ti Laoag.
Segun ken ni PSSgt. Artemio Magaoay Jr., Duty Investigator ti Philippine National Police Laoag Traffic Division, manamnama nga agsasarita dagiti agsinnungbangir a partido ita a bigat tapno ditoy a mapagnunumoan dagiti rumbeng a maaramid nangruna ket pimmusay ti driver ti motorsiklo gapu iti kinapigsa ti impact ti desgrasia.
Inbatadna a posible a sumango ti nangiturong ti pick-up ti Reckless Imprudence Resulting to Homicide and Damage to Property.
Nupay kasta, kunana nakadipende ti desision ti pamilya ti biktima gapu ta rumrummuar iti imbestigasion a ti nakamotorsiklo ti akin basol iti napasamak a desgrasia.
Inlawlawagna a nagsagaba ti nakana a sugat ti ulo ti biktima kalpasan a naitupa ti ulona iti kalsada a dagus a naitaray iti Governor Roque Ablan Sr Memorial Hospital ngem saan a nagbayag ket naiyakar daytoy iti Black Nazarene ket ditoy a pimmusay kalpasan ti sumagmamano nga oras bayat a matamtaming daytoy.
Innayonna a naparpar ti sango ti pick-up ken naidungpar iti signage post idinto a nadadael met ti sumagmamano a paset ti motorsiklo.
Maipalagip a bayat a dumaldalyasat ti Pick-up Toyota Hi-lux nga agturong nga agpa-amianan ket dita a kellaat a dimmungpar ti nakamotorsiklo a Yamaha Mio 125 nga agturong met nga agpa-daya.
