LAOAG CITY – Patien ni Miss Diana Joy Pagdilao iti Brgy. Pagdilao iti ili ti Pinili a ti panagtalek na iti bagi ken pammati iti Diyos ti a tulbek iti pannakapasa na iti Criminologist Licensure Examination.
Inlawlawag na a no awan ti panagtalek na iti bagina ken awan ti pammati na iti Diyos ket nalidem a magun-od na ti arapaap na nga agbalin a naan-anay a pulis.
Inadmitir na nga adda dagiti gundaway idi manarimaan paylaeng ti panag-review na a kayaten a sumuko ti bagina ken ginandat na payen ti saan nga agtuloy nga ageksamen.
Nupay kasta, babaen ti panangiturong kenkuana ti Diyos ken suporta ti pamilya, papagayam ken dagiti kakadwa na iti nakikappengan na a relihiyon ket nagbalin a natibker ken positibo a kabaelan na ti ageksamen para iti Criminologist Licensure Examination.
Inpanakkel pay ni Pagdilao a ti kangrunaan a nagbalin nga inspirasyon na ket ti ina na gapu ta isuna ti kangrunaan a nangisakad iti panagadal na.
Agpapan ita ket arigna saan paylaeng a mamati ni Pagdilao a nakapasa iti nasao nga eksaminasyon gapu ta malaksid a narigat ken naipangato pay ti passing rate.
Mainaig iti daytoy, kuna ni Pagdilao a kabayatan nga iyur-uray na ti lisensya na ket agipasa paylaeng ti resume na kadagiti mabalin na nga aplikaran a trabaho tapno saan a matambay.
Kabayatanna, binalakadan ni Pagdilao dagiti kakadwa da a saan a nakapasa nga adda ti oras ti amin a banag isut gapuna a saan a rumbeng a mapukawan ti namnama.
Ni Pagdilao ket nagturpos iti University of Northern Philippines (UNP) iti ciudad ti Vigan ken agdama a kameng ti Kabataan kontra Droga at Terorismono sadinno a plano na ti ad-adda pay nga agbalin nga aktibo iti daytoy kalpasan a nakapasa iti Criminologist Licensure Examination.
