LAOAG CITY – Nasakit ti nakem ni Mr. Anselmo Jacinto iti Barangay 32-B Lapaz ditoy ciudad ti Laoag kalpasan a maipagarop a pinangpang-or ti kabarangayan na a ni Mr. Jerry Bernabe ti motorsiklo na.
Inpetteng na nga awan ti ammo na a rason no apay nga inaramid daytoy ni Bernabe.
Inpalgak na a ti maysa pay a kasakit ti nakem na ket maipagarop a buybuayen lattan dagiti barangay tanud ken konsehal ti inaramid ni Bernabe iti motorsiklo na.
Segun ken ni Jacinto, iti panagsaludsud na ken ni Bernabe no apay a pinangpang-or na ti motorsiklo na ket awan ti naisungbat na gapu ta awan basol da kenkuana.
Inrakurak pay ni Jacinto a karruba da ti maysa a konsehal a ni Allan Pascual ngem maipagarop a saan pulos a nagresponde iti napasamak.
Kuna na nga idi 2017 ket tinubtub ni Bernabe ken ti ama na dagiti tawa iti balay da ken agpapan ita ket saanda pay a binayadan.
Mainaig iti daytoy, inbatad ni Jacinto nga ibagbaga da nga adda ti diperensya iti panunot ni Bernabe ngem saan a mamati gapu ta awan ti pammaneknek iti daytoy.
Kalikagom ni Jacinto a bayadan amin ni Bernabe dagiti nadadael na iti motorsiklo na ken no mabalin ket sukatan na ti sibubukel a lugan na gapu ta nakaad-adon ti perdisyon daytoy gapu iti panangpangpang-or na.
Kabayatanna, inpalgak ni Barangay Chairman Estelino Antonio iti nadakamat a barangay a pito nga aldawen nga agsaksakit ken saanna a naam-ammoan ti riri da Jacinto ken Bernabe.
Inbatad ni Antonio nga iti panagsaludsud na kadagiti barangay tanud na no apay a saan da a nagresponde ket insungbat da nga adda ti panagamak da gapu ta naka-immuko ken nakaiggem ti tubo dagiti maseknan.
Nupay kasta, saan a kinanunungan ti kapitan ti inaramid dagiti barangay tanud isut gapuna nga inpalgak na a masapol a nakiballaet koma dagitoy gapu ta isuda ti maibilang a pulis iti barangay.
Kabayatanna, kinumpirmaran ti kapitan nga adda idi ti susik da Jacinto ken Bernabe ngem nasolbaren daytoy.
Innayon na a ti assessment na ket uray ti asawan a maysa a barangay health worker iti barangay da ket adda ti diperensya ti panagpanpanunut ni Bernabe no sadinno nga ita nga aldaw ket schedule na a mapan agpatudok iti ospital tapno agkalma ti panunot na.
