LAOAG CITY – Inbatad ni Engineer Maria Teresa Bacnat, Provincial Agriculturist ditoy probinsia a ti kinakurang ti suplay ti bawang ditoy Ilocos Norte ti maysa a rason no apay a naipangato ti presyo na.
Inpalgak na a naipagagangayen a no adda panagkurang ti suplay iti aniaman a produkto ket ngumato met ti presyo na.
Inlawlawag ni Bacnat nga iti agdama ket saan pay a nakaapit dagiti mannalon iti bawang ditoy probinsya isut gapuna nga adda ti panagkurang ti suplay iti nasao a produkto.
Kuna na a kadagitoy a gundaway ket umabot iti 200 agingga iti 300 a pisos ti presyo ti bawang iti kada kilo ditoy probinsya.
Malaksid iti kinakurang ti suplay ket bimmassit pay ti bilang dagiti mannalon a nagmula ti bawang ditoy probinisa.
Innayon na a no ikompara idi 2021 ket bimmaba iti agarop 100 nga ektaria dagiti namulaan ti bawang ditoy probinsia.
Inkalintegan pay ni Bacnat a gapo iti kinangina dagiti agricultural inputs a mausar iti panagmula ti bawang ket ado a mannalon ditoy probinsia ti saan a makabael nga agmula ti nasao a produkto.
Nupay kasta, impasigurado ni Bacnat a nakasagana ti gobierno probinsial a tumulong kadagiti mannalon babaen ti panang-subsidized ken panangipaay da kadagiti kasapulan nga agricultural inputs dagiti garlic growers ditoy probinsia, tapno makapagmula da iti nasao a produkto.
Kabayatanna, kuna ni Bacnat a manamnama nga adda ti pagbabaan ti presyo ti bawang ditoy probinsia intono Pebrero gapo ta mangrugin nga agapit dagiti mannalon.
