LAOAG CITY – Balligi nga inrubuat ti Philippine Navy iti Ulsan, South Korea idi Oktubre 13, 2026, ti maikatlo nga Offshore Patrol Vessel-na a BRP Rajah Humabon.
Ti baro a warship ket inaramid ti nalatak a South Korean shipbuilder nga HD Hyundai Heavy Industries kas paset ti modernization program ti Armed Forces of the Philippines.
Manamnama a papigsaen ti BRP Rajah Humabon ti kabaelan ti pagilian mainaig iti maritime surveillance, nasional a seguridad ken panangpatalinaed ti territorial a depensa.
Indauloan ni Armed Forces of the Philippines Vice Chief of Staff Lieutenant General Rommel P. Roldan ken Philippine Navy Flag Official in Command Vice Admiral Jose Ma. Ambrosio Q. Ezpeleta ti opisial a delegasion ti nadakamat a seremonia.
Sakbay ti panangirubuat, nakitaripnong pay ni Ezpeleta iti national a panguluan ti Republic of Korea Navy tapno ad-adda a patibkeren ti pangbaybay a kooperasion iti dua a pagilian.
