LAOAG CITY – Mangipaay ti palasio Malacañang ti sag-P100,000 a tulong pinansial kadagiti dua a miembro ti Philippine Navy a nagsagaba ti sugat iti napasamak nga insidente iti Ayungin Shoal.
Segun iti Palasio, ti ayuda ket agserbi kas pammigbig iti sakripisio ken dedikasion dagiti suldado a nadangran bayat ti panangprotprotektarda iti pagininnagawan a paset ti West Philippine Sea.
Kabayatanna, saan pay nga inruar ti Malacañang ti kinasiasinno dagiti dua a Navy personnel ken dagiti detalye ti sinagabada a sugat ngem impasiguradoda nga agtultuloy ti panangipaayda ti suporta bayat ti manarimaan a panagpaimbagda.
Maipalagip nga immunan a dinakamat ti Armed Forces of the Philippines (AFP) a namalo ti miembro ti Philippine Navy ti baton a kayo a nangitunda ti pannakasugat ti ulo ti suldado.
Kabayatanna, naglikudan met ti China Coast Guard (CCG) ti alegasion ken inpettengda a dagiti Pilipino ti immuna a nangpadas a nangmalo kadakuada.
