LAOAG CITY – Inpasigurado ni Senator JV Ejercito ti saan a pannakausar ti rakurak a 2027 national budget para iti impeachment trial kontra ken ni Vice President Sara Duterte.
Kas mangidadaulo iti Senate Committee on Finance, naglikudan ni Ejercito ti alegasion ti bise presidente a mabalin nga aramaten ti gobierno ti pondo para iti pamumulitika ken tapno magutigot dagiti agpanpanday linteg a pumabor iti conviction iti impeachment trial.
Immunan iti daytoy, kwinestionaran ni Duterte no mausar ti rakurak a 2027 national budget iti maipagarup a panangibunong ti kuarta pakaseknan iti impeachment proceedings.
Iti baet daytoy, namnamaen ni Ejercito a saan a makwestionaran ti agbalin a desision dagiti senador nga agserserbi kas senator-judges iti manarimaan nga impeachment trial.
Inbatadna nga adu dagiti karit a masapol a solusionan ti gobierno, ngem paset iti pagrebbengan dagiti senador ti panangipatungpalda ti konstitusional a responsibilidad iti impeachment proceedings.
Inpettengna a saanda a palubosan a mausar ti budget ti pagilian para iti daytoy a banag.
Kinunana a kas mangidadaulo iti Senate finance committee, pagrebbenganna a siguradoen a mausar ti pondo para kadagiti nakaikeddenganna a proyekto.
