LAOAG CITY – Inbatad ni Department of Budget and Management (DBM) Secretary Kim Robert de Leon kadagiti mammanday-linteg ti Kamara nga awan ti “leadership fund” a maipalubos iti national budget para iti 2027.
Iti judicial affidavit, dinakamat ni dati a Department of Public Works and Highways (DPWH) Manuel Bonoan ti maysa a pondo a nakaipaay kadagiti senador iti di kumurang a P500 million para kadagiti priority projects.
Kabayatan ti panagtalantan ti House Committee on Appropriations iti funding proposal ti Development Budget Coordination Committee (DBCC), kinuna ni De Leon nga awan ti ammoda iti kastoy nga allocations gapu ta dagiti laeng proposal nga insubmitir ti ahensia ti ma-evaluate da.
Kinuna pay ti sekretario ti DBM a tunggal proyekto iti babaen ti DPWH iti National Expenditure Program (NEP) para iti 2027 ket suportado ti “kompleto a dokumentasion.”
Iti panagtalantan, sinaludsod ni Caloocan City 2nd District Representative Edgar Erice iti DBM no umno ti panang-vet-da kadagiti proyekto ti DPWH, gapu iti kontrobersia a pakairamanan dagiti programa a mangkontrol iti layus.
