Pinaigetan ti Department of Agriculture (DA) ti kampania iti panagbakuna kontra iti African Swine Fever (ASF) kalpasan a nabakunaan ti agarup 500,000 a baboy kabayatan a 65 a porsiento dagiti naapektaran a lugar ket nakarekobren.

Segun ken ni Agriculture Secretary Francisco Tiu Laurel Jr. a gagem daytoy nga addang a maisubli ti lokal a produksion iti dati a lebel sakbay a tumama ti African Swine Fever (ASF) idi 2019 nga umabot iti sumurok-kumurang 13 a million a baboy.

Inbatad met ti Bureau of Animal Industry (BAI) nga umabot iti 499,008 doses (99.8% utilization) naitudok manipud 2024 agingga iti umuna a gudua ti 2026 iti pito a probinsia, pakairamanan ti panagusar ti AVAC ASF Live Vaccine manipud Vietnam.

Pinapigsa pay ti proteksion ti lebel ti komunidad iti babaen ti Community Animal Biosecurity Interventions (CABI) ken panangipaay ti P49.824 a million a tulong pinansial kadagiti naapektaran a mannalon iti walo a rehion.

Nupay kasta, agtalinaed nga aktibo ti kaso ti African Swine Fever (ASF) iti 236 a barangay iti 23 a probinsia, idinto a 716 a lugar ti naibilang kas buffer zones.

Kabayatanna, agtultuloy ti panawagan ti Department of Agriculture para iti ad-adda a naiget a biosecurity.