Binalakadan ni Doctor Samantha Licudine, ti mangidadaulo ti City Veterinary Office, dagiti umili nga agannad kontra iti sakit dagiti baboy nga African Swine Fever (ASF) nupay awan ti nairekord a kaso ditoy siudad ti Laoag.
Segun kenkuana, saan a masapol nga agkampante ti publiko kangrunaan na ket adda dagiti agdama a kaso kadagiti kabangibang a lugar pakairamanan ti probinsia ti La Union ken ti Isabela iti Rehion II.
Mainaig iti daytoy, kunana nga agtultuloy latta ti koordinasion da kadagiti opisial ti barangay ken Provincial Veterinary Office tapno masigurado nga awan ti maiserrek a karne iti siudad a saan a dimmalan iti umno a proseso kas iti naggapoan na ken no kompleto dagiti papeles daytoy.
Kabayatanna, ginutigot ni Dr. Licudine dagiti umili a nasaysayaat no aggapo iti mismo a siudad ti ilako da a karne wenno kadagiti kabangibang nga ili ken siudad ditoy probinsia tapno maipasigurado ti kinatalged dagitoy kangrunaan ta iti sumarsaruno a bolan ket kasapulan dagiti umili ti karne ti baboy kagiddan ti Ber-Months.
