Inbatad ti maysa a babai idiay Michigan a gapu iti routine trip na iti grocery store ket nangitunda iti panangabak na ti $1 million prize manipod iti Powerball drawing.
Segun ken ni Alisa Moore, agtawen ti 61, kalepleppas na laeng a nag-grocery iti Kroger store iti East 12 Mile Road iti Royal Oak idi napanunot na ti gumatang ti ticket para iti Powerball drawing.
Kuna na nga iti sumuno nga aldaw paylaeng nga in-scan na ti ticket iti Michigan Lottery app.
Inrakurak na a kalpasan a na-scan na ti ticket ket adda a dagus ti naawat na a notification a nangabak ti $1 million.
Innayon na nga idi mabasa na ti notification ket dandani naregreg iti nagtugawan na gapu iti nagbalin a reaksyon na, kagiddan ti panangulit na a nang-scan iti namintallo a daras gapu ta saan a mamati iti gasatna.
Inpakaammo ni Moore a ti inabak na ket pagbayad na ti balayna ken idulin na para iti masakbayan na.
