LAOAG CITY – Balligi ti pannakaiyuswat ti Dugong Bombo 2026: A Little Pain, A Life to Gain ti Bombo Radyo Philippines a naiyuswat iti Laoag City Auditorium.
Ditoy Ilocos Norte, umabot iti 175 ti nagbalin a successfull donor ken idinto a 56 met ti deferred.
Mainaig iti daytoy, napalaos ti panagyaman ni Mrs. Edna Orcino, administrator ti Philippine Red Cross Ilocos Norte Chapter iti pakabukelan a naukkon a naidonar a dara babaen ti programa ti Bombo Radyo Philippines Dugong Bombo 2026.
Mangnamnama ni Orcino a dagiti amin a naukkon a dara ket agbalin a satisfactory ti laboratory tests-na tapno iti kasta ket mabalin dagitoy a maipaay kadagiti pasiente nga agkasapulan ti dara.
Inpettengna ti importansia ti maaddaan ti naan-anay ken regular a suplay ti dara iti Philippine Red Cross tapno masigurado a dagiti tunggal pasiente nga agkasapolan ti dara ket maipaayan ken maisalakanda ida iti sakit nga agkasapolan ti dara.
Inpakaammo ni Orcino a silulukat ti opisina ti Philippine Red Cross iti 24/7 tapno akomodaren dagiti agkiddaw ti dara.
Kinunana a masapol ti maysa nga ag-request ti blood request slip a maiprisintar iti Blood Center ti Philippine Red Cross gaputa ditoy ti agbalin pagibasaranda no ania a klase a blood component ti masapol a maipaay kadagiti pasiente.
Kabayatanna, ti Dugong Bombo ket naiyuswat kadagiti 25 key areas ti Bombo Radyo Philippines ken tinawen daytoy a maisaysayangkat kadua na ti Bombo Radyo Philippines Foundation Inc. ken Philippine Red Cross
