LAOAG CITY – Ituloy ita a lawas ti House Committee on Appropriations ti panangtratar iti gakat a P6.793 trillion a national budget para inton 2027, pakairamanan ti pondo dagiti ahensia, teknolohia, turismo, ayuda ken trabaho.
Inton Setiembre 7, trataren ti budget ti Department of Education, Department of Health, Judiciary, Department of Information and Communications Technology ken Department of Tourism.
Sumaruno met iti gakat a pondo ti Department of Social Welfare and Development ken Department of Labor and Employment inton Setiembre 8.
Maipalagip nga idi Setiembre 3, tiningiting ti komite ti budget ti Department of Transportation, Dapartment of Agrarian Reform, Department of Foreign Affairs ken Commission on Human Rights.
Addaan ti gakat a P300.96 billion a budget ti Department of Transportation para inton sumaruno a tawen, nangatngato daytoy ti 118.33% kumparar iti pondo iti tawen 2026.
Nupay kasta, adda met P14.61 billion ti proposed budget ti Department of Agrarian Reform para iti agtultuloy ti reporma iti daga, kabayatan a P35.17 billion ti kiddaw ti Department of Foreign Affaire para iti diplomatic operations ken panagtulong kadagiti Pilipino iti sabali a pagilian.
Kabayatanna, inanunsio ti Department of Foreign Affairs a target-da nga iparuk-at ti baro a Philippine passport design inton Hunio 2027.
Maaddaan pay ti naiget nga advance security features ken contactless chip technology kabayatan nga agtalinaed ti 10 a tawen ti validity.
