LAOAG CITY – Nauram ti sumagmamano a paset ti maysa a kurung-kurong iti paset ti Mc Kinley St. Barangay 10 ditoy ciudad ti Laoag.
Nabigbig ti akinbagi iti kurung-kurung a ni Mr. Bryan Manna a residente iti Brgy. Crispina iti ili ti Banna.
Segun ken ni Manna, napan da nagdeliver iti kaimito iti tiendaan ditoy ciudad ti Laoag no sadinno a nga inparking da ti kurung-kurung da iti Mc Kinley St. iti nadakamat a barangay.
Inlawlawag na nga idi agawid da koman ket saan da a mapagandar ti kurung-kurung rason nga inapsot da ti sparkplug ken idi insubli da ket bigla a gimmil-ayab.
Mamati a nag-overflow ti motorsiklo a kimmamang iti ignition switch a daytoy ti nangitunda ti pannakauram ti nasao a lugan.
Kabayatanna, inbatad ni Fire Senior Inspector Ronald Castillo, ti Firemarshall ditoy ciudad ti Laoag a mabalin nga idi inkabil da Manna ti sparkplug na ket saan da a naiplastar a naimbag ti suwako na a pagnaan ti kuryente nga isu ti nagback-fire.
Innayon na a no dimmanon iti tangke ti gasolina ti apoy ket dakkel ti posibilidad na a bimtak ti nasao a kurung-kurong.
