Balligi a naiwayat ti pannaka-interview kadagiti aplikante ti
Raniag Asenso Agtutubo Scholarship Program ditoy siudad ti Laoag.
Segun ken ni Sangguniang Kabataan President Laoag Rionell Jan Respicio, adda ti mapili a nasurok 100 nga scholars tapno makompleto ti 424 nga scholars ti siudad para iti kurso manipud iti Agri-Fisheries, Academic ken Community Youth Leadership.
Mainaig iti daytoy, nanayonan ti pondo ti scholarship program babaen ken ni Mayor James Bryan Alcid tapno ad-ado dagiti agtutubo a matulungan, kangrunaan dagiti nakurapay a pamilya.
Kunana a babaen iti daytoy ket maitultuloy ti kalikagom ti lokal a gobierno ti siudad a papigsaen ti suporta a maipaay kadagiti agtutubo a Laoagueños iti panagadal da iti kolehio.
Patien ni Respicio a rumbeng laeng a maaddaan ti patas a gundaway dagiti agtutubo tapno agadal ken in-inot a maragpat ti arapaap da.
Kabayatanna, iti met biang ni Mayor Alcid, patien na a napateg ti adal tapno maaddaan ti napinpintas a masakbayan dagiti agtutubo.
