LAOAG CITY – Natay ti maysa a lakay kalpasan a nadungpar ti motorsiklo iti Barangay Teppang iti ili ti Bacarra.
Basar iti Philippine National Police (PNP) Bacarra, ti biktima ket agtawen ti 75 idinto a ti driver ti motorsiklo a nakadungpar ket agtawen ti 35, ken agpada dagitoy a residente iti nasao a barangay.
Segun kenni Police Major Arnel Tabaog, ti chief of police ti Philippine National Police-Bacarra, iti imbestigasyon da ket agpaabagatan ti nakamotorsiklo ken idi adda iti kurbaan ket naovershoot a nangitunda ti pannakadungpar ti biktima.
Inbatad na a dagus met a naitaray dagiti dua iti ospital nge pimmusay ti lakay bayat a maag-agasan idinto a ti driver ti motorsiklo ket nagsagaba ti gasgas iti nagduduma a paset ti bagi na.
Rumrumuar nga awan ti suot nga helmet ken awan ti lisensya ti driver ti motorsiklo.
Iti agdama, adda iti kustudiyar ti PNP-Bacarra ti driver ti motorsiklo bayat a maisagsagana ti kaso a maipila kontra kenkuana.
