LAOAG CITY – Inpetteng ni Mr. Genaro dela Cruz, ti Presidente iti Alyansa dagiti Mannalon iti Ilocos Norte (AMIN) ditoy probinsya a nababa unay ti P125 iti kada kilo a presyo ti sibuyas.
Reaksyon na daytoy kalpasan nga intuding ti Department of Agriculture (DA) a ti Suggested Retail Price (SRP) ti sibuyas ket P125 a pisos iti kada kilo.
Maladingitan ni dela Cruz gapu ta immanamong ti gobierno iti daytoy iti laksid a nangato ti cost of production dagiti agmulmula ti sibuyas.
Kuna na a no saan a nabbaba ngem ti P200 a pisos iti kada kilo ket mabalin nga adda bassiy ti maabrot dagiti mannalon.
Inpalagip ni dela Cruz nga agtultuloy a ngumatngato dagiti ‘farm inputs” kas ti ganagan ken dadduma a kemikal nga us-usaren da ken manmano dagiti mannalon a saan a makautang gapu kadagiti kasapulan da nga agtalon.
