LAOAG CITY – Tiniliw dagiti kameng ti Philippine National Police (PNP) ti maysa a lalaki gapu iti maipagarop a panangubor na ti service vehicle ti National Bureau of Investigation (NBI) iti ciudad ti Batac.
Binigbig ni Police Lt. Col. Adrian Gayuchan, ti chief of police iti ciudad ti Batac ti suspek a ni TJ Oducayen y Lirag, agtawen ti 24, baro, estudyante ken residente iti Barangay 6, San Juan iti nasao a ciudad.
Segun ken ni Gayuchan, napan nagreport iti opisina da ni Ablezer Rivera y Tagatac, agtawen ti 59, naasawaan, National Bureau of Investigation agent ken residente met laeng iti nadakamat a barangay.
Inbatad na a ti palawag ni Rivera ket napan riniing ti kaanakan na a ni Hope Millare, addaan iti umno a tawen, barangay kagawad iti nadakamat a barangay tapno ipakaammo a bakbakalen ti suspek ti iturturong na a lugan.
Inpalgak ni Rivera a ginandat ti barangay kagawad a lapdan ti suspek ngem intultuloy na latta ti nangbakal iti lugan a nakadadaelan ti sumagmamano a paset ti likudan na.
Inpakaammo ni Gayuchan a mapapati a nakainom ti nasanger ni Oducayen idi napasamak ti insidente.
Innayon na nga iti panagresponde dagiti kameng ti pulisya ket ditoy a tiniliw da ti suspek ken napilaan ti reklamo a Malicious Mischief (Damage to Government Property).
