LAOAG CITY – Natay ti maysa a lalaki nga addaan ti rangkap ti bagi kalpasan a nadungpar kabayatan a lumasat iti kalsada iti paset ti Brgy, Nagbacala iti ili ti Paoay.
Binigbig ni Police Major Sheryll Guzman, Chief of police iti nasao nga ili iti biktima a ni Gasat Cabuyadao y Rarugal, agtawen ti 38 ken residente iti met laeng iti nadakamat a barangay.
Inbatad na a basar iti naiyuswat nga imbestigasyon, agpaabagatan ti Toyota Innova a inturong ti nabigbig a ni Raymond Benas y Besa, agtawen ti 30, driver ti maysa a bus company ken residente iti Brgy. 2, Pasuquin.
Kuna na a dita met a lumasat iti kalsada ni Cabuyadao ken kellaat a nadungpar ti innova rason a nagsagaba ti nakana a sugat iti nagduduma a paset ti bagi na.
Inbatad na a naitaray ti biktima iti Mariano Marcos Memorial Hospital and Medical Center ngem naideklara a Dead on arrival idinto a ti driver ti innova ket saan a naan-ano.
Kabayatanna, rumrumuar a napaspas ti taray ti innova idi napasamak ti insidente.
Inpakaammo ni hepe Guzman nga iti agdama ket nagtalinaed iti kustodyar ti PNP ti suspek ken manamnama a sumango ti kaso a reckless imprudence resulting to homicide.
