LAOAG CITY – Nakagun-od ti innem a pammadayaw ti Division of Ilocos Norte iti kalepleppas a Region 1 athletic Association meet a naiyuswat idiay San Carlos City, Pangasinan.
Daytoy ti inpakaammo da Mr. Gene Reginaldo nga sports officer ti Division Of Ilocos Norte ken ni Mr. Eric Aguilar, ti Division Sports Coordinator.
Kuna ni Aguilar a karaman kadagiti nakapadayawan ti Division of Ilocos Norte ket Best Performing Division iti ay-ayam a sepak takraw, wushu, softball, football, billiards ken baseball.
Immuna iti daytoy, inlawlawag ni Reginaldo nga awan dagiti naideklara nga over-all champion ngem ketdi naiwaras ti pammadayaw kadagiti best divisions.
Kabayatanna, inpakaammo na a ti Division of Ilocos Norte ket isu ti maikadua a kaaduan ti naukkon a medalya wenno sumaruno iti Pangasinan 2 ken maikatlo met ti Division of Laoag City.
Mainaig iti daytoy, inbatad ni Reginaldo a gapu ta nabaliwan ti sistema ti Region 1 athletic Association meet ket awan ti mapasamak a selection kadagiti makipaset iti Palarong Pambansa.
