LAOAG CITY – Manamnama a mairugi a maipasdek ita a tawen 2023 dagiti proyekto iti agrikultura a dinakamat ni Gob. Matthew Marcos Manotoc a maipasdek ditoy probinsia iti tulong ti Department of Agriculture wenno DA.
Segun ken ni Engr. Maria Teresa Bacnat, Officer In-charge ti Provincial Agriculture Office, nalpasen ti bidding para iti pannakaipasdek ti tomato cold storage facility iti ili ti Sarrat.
Inbatadna a napundoan ti nasao a proyekto iti uppat a pulo ket uppat a milyon a pisos.
Kunana a naggapo ti pundo iti World Bank ken adda ti “counterpart” ti Department of Agriculture.
Inlawlawagna a plano a maipasdek ti nasao a proyekto iti Brgy. San Joaquin agsipud ta maiyawat ti pannakaiwanwan daytoy iti San Joaquin Multi Purpose Cooperative.
Kuna ni Bacnat a dakkel a tulong ti nasao a pasilidad kadagiti mannalon ditoy probinsia nangnangruna kadagiti agmulmula ti kamatis gapu ta nairanta a pakaidulinan daytoy dagiti produkto a kamatis bayat ti kaaduna.
Kabayatanna, inpakaammona a manamnama a maiyestablisar ti “fishery cold storage facility” iti compound ti Provincial Agriculture Office.
Inbunannagna a nakasagana metten a maisayangkat ti bidding para iti nasao a proyekto iti masungad a lawas.
Innayonna a napundoan daytoy iti duapulo a milyon a pisos babaen iti Department of Agriculture.
