LAOAG CITY – Inbatad ni Dr. Loida Valenzuela, ti Provincial Veterinarian ti Ilocos Norte nga agultuloy ti panangbakuna da kadagiti aso ditoy probinsya.
Daytoy ket kalpasan ti pannakaideklara ti rabies outbreak iti Ilocos Norte gapo iti agtultuloy a panagngato ti kaso dagiti aso nga agpospositibo.
Segun kenni Valenzuela, 53 a barangay iti Ilocos Norte ti positibo ken adda met dagiti nakagat nga isu ti mangitultuloy ti panagbakuna da.
Inbatad na pay nga adda ti dimmanon kenkuana nga impormasyon manipud iti maysa nga ili nga adda ti aso a nangkagat iti baka ken nangwakwak kadagiti babassit a karnero.
Kunana a saanen a naipadalan iti eksaminasyon ti samples dagiti kinagat ti aso gapo ta naikali dagitoy a dagus kalpasan a pimmusay.
Mainaig iti daytoy, inlalawag a nga idi napalabas a Disyembre ket adda ti nagpositibo iti rabies iti ili ti Badoc, simmaruno ti ciudad ti Batac, iti ili ti Paoay, Laoag City ken dadduma pay.
Kabayaanna, kunana a karaman kadagiti rason no apay a kellaat ti panagngato ti kaso ti rabies ditoy probinsya ket ti saan a pannakabakuna dagiti aso bayat ti pandemya no sadinno ket bimmaba ti immunity level da a panglaban iti rabies, kasta pay ti kinakurang ti responsibilidad dagiti agtartaraken.
