LAOAG CITY – Natay ti maysa a lalaki kalpasan a nagbaliktad ti nagluganan na a kurong-kurong bayat ti panangliklik na iti van nga ag-U-turn iti kalsada a paset ti Barangay Santiago iti ili ti Solsona.
Binigbig ni Police Capt. Randy Damo, ti Chief of Police ti Philippine National Police iti ili ti Solsona ti driver ti kurong kurong a ni Mr. Romnick Andres, agtawen iti 32, awanan asawa ken residente iti Brgy. San Juan iti nadakamat nga ili idinto a dagiti pasaheros na ket da Anacleto Ramos, agtawen ti 56 ken Orlando Santa Monica nga agtawen ti 62, maysa a mannalon ken agpada a residente iti Barangay Suyo iti ili ti Dingras.
Kunana a basar iti inisyal nga imbestigasyon da, agpalaud ti kurong-kurong idi nakita ti driver ti van nga ag-U-turn.
Gapo iti daytoy, ginandat ti nakakurong-kurong a liklikan ti van ngem ditoy metten ti panagbaliktad da no sadinno napandagan ti ulo ni Ramos.
Naitaray daytoy iti Rural Health Unit iti ili ti Solsona ngem naiyakar iti Gov. Roque Ablan Sr. Memorial Hospital ditoy ciudad ti Laoag ngem saan a naisalbar ti biag ni Ramos.
Kuna ni Damo a no kitkitaen ti desgrasya ket awan ti basol ti Van gapo ta adayo pay laeng daytoy ket naka-signal light.
Naamoan a kaliplippas ti panagtudo iti nasao nga ili idi napasamak ti insidente rason a nagalis ti dalan.
