LAOAG CITY – Naisubli iti Bahay Pagasa iti Barangay 48-A, Cabungaan ditoy ciudad ti Laoag ti baro a ni Kairuz James Cruz a kanayon nga aglibas.
Daytoy ti kinumpirmaran ni Police Capt. Wylro Gatoc, ti officer in charge iti Criminal Investigation and Detection Group (CIDG).
Segun kenni Gatoc, ti resulta ti RT-PCR test ti baro ket negatibo ngem saan da nga ammo no ipaima da iti korte wenno iti Bahay Pagasa.
Inlawlawag na a dagiti dadduma a dokumento para iti pannaibalod ni Cruz ket adda iti korte.
Inbatad na nga inpan da iti Bahay Pagasa ni Cruz bayat nga ur-urayen da ti commitment order manipud iti korte.
Maipalagip a natiliw dagiti otoridad ti baro idiay Caloocan City kalpasan ti sumagmamano nga aldaw sipud naglibas iti Bahay Pagasa.
Innayon ni Gatoc a ti nakatiliwan ni Cruz ket isu met laeng ti lokasyon a nakatiliwan na idi maikapat a gundaway a naglibas manipod iti Bahay Pag-asa.
